Shpetim Duro

Pozicioni: Trajner

‘Guerrils’: Mos e prekni Duron!

“Ultras Guerrils” dje kanë postuar në faqen e tyre në “Facebook” një thirrje në drejtim të ekipit dhe drejtuesve. Ja apeli i tyre: “Ne jemi aty kur ju fitoni, jemi aty kur ju luftoni, jemi aty kur na bëni krenarë, jemi aty kur kilometrat janë veç detaj, jemi aty në të mirë e në të keq.

Ju mbështesim gjatë gjithë kohës, ju duartrokasim, mbase më shumë atëherë kur nuk e meritoni, ua bëjmë të qartë që kurrë nuk do të jeni vetëm, jemi aty kur një qytet i tërë mundohet të na ndalojë, por askush nuk mund të arrijë të na ndajë nga ju!

Çdo gjë e bëjmë pa ndihmën e askujt, nuk ja dimë për nder asnjërit dhe kështu do të vazhdojmë, mbase do të bëhemi edhe më të fuqishëm, edhe më të fortë e gjithçka vetëm për atë fanellë që ju e mbani mbi supe e që duhet t’ia kuptoni rëndësinë. Ne do të vazhdojmë të mbështesim, ashtu siç dimë ne, por na keni shumë borxh.

Zakonisht nuk na intereson rezultati apo pozicioni në tabelën e klasifikimit, por kësaj radhe kërkojmë me çdo kusht arritjen e objektivit ‘Europë’! Duam transfertën europiane, ndaj duam impenjimin tuaj dhe do të keni mbështetjen tonë! Si përfundim, kemi dhe një mesazh për drejtuesit, as të mos guxojnë dhe të mendojnë të vënë në diskutim trajnerin, përndryshe do të viheni të gjithë ju në diskutim! Duro qëndron! Të gjithë drejt Durrësit!”.