Raçiç i bie të fikët në stërvitje, nuk ka rrezik

Sulmuesi i të kuqve ka humbur ekuilibrin dje, pasi nuk kishte konsumuar mëngjes. Sot analizat e detajuara

Stefan Raçiç nuk ka kaluar momentin më të mirë të tij në seancën e djeshme stërvitore. Sulmuesi kryesor i të kuqve nuk e kishte konsumuar mëngjesin si gjithë pjesa tjetër e skuadrës në hotel dhe kjo është bërë shkak për një problem të tijim shëndetësor gjatë stërvitjes. Kur kishte rreth 20 minuta që kishte nisur seanca stërvitore nën drejtimin e trajnerit Duro, Raçiç nuk është ndjerë mirë duke i rënë të fikët në fushë. Lojtari është parë nga shokët e skuadrës dje anëtarët e stafit mjekësor, që kanë shkuar menjëherë pranë sulmuesit shtatlartë për ta përmendur atë. Për pak sekonda Raçiç është ngritur në këmbë duke marrë edhe sasinë e nevojshme të lëngjeve, që nevojiten për të kaluar këtë rast. Megjithatë futbollisti nuk është lejuar nga trajneri Duro për të vazhduar seancën stërvitore, duke iu drejtuar dhomave të zhveshjes më herët se pjesa tjetër e grupit, që në prag të ndeshjes ndaj Tiranës ka qenë i plotë dhe pa asnjë mungesë në përbërje.

Gjendja – Arsyeja e humbjes së ekuilibrit të futbollistit serb që është pjesë e Partizanit, ka ardhur për shkak të pagjumësisë dhe moskonsumimit të mëngjesit. Një gjë e tillë është konfirmuar menjëherë dje gjatë momentit që lojtari nuk është ndjerë mirë. Gjithsesi duhet thënë se gjendja e tij shëndetësore është përmirësuar dhe nuk rrezikon që të mungojë në takimin ndaj Tiranës, i cili do të luhet të hënën në stadiumin Kombëtar “Qemal Stafa”. Madje Raçiç parashikohet të jetë në fushë gjatë ditës së sotme, ku është parashikuar të zhvillohet një ndeshje miqësore ndaj ekipit të Kategorisë së Tretë, “Fc Kevitan”. Gjithsesi mësohet se pas mesdite lojtari do të kryejë disa analiza për të konfirmuar gjendjen e tij shëndetësore. Gjatë këtij sezoni futbollistik, Raçiç ka qenë një nga lojtarët më në formë në kampin e kuq, duke arritur të shënojë dhe t’i japë Partizanit pikë të arta. Ndërsa në ndeshjen e fazës së tretë ndaj Tiranës, sulmuesi arriti të shënonte golin e dytë.